Nasist Almaniyasının Fransa kampaniyası və onun nəticələri - Balamirzə Məmmədli
Nasist
Almaniyasının, qərb tarixşünaslığında “Fransanın süqutu” kimi tanınan Fransa
kampaniyası, ikinci dünya müharibəsinin birinci mərhələsinin ən mühüm hadisələrindən
biridir. Almaniyanın Polşaya hücumuna cavab olaraq ona müharibə etmiş Britaniya
və Fransanı hədəfə alan Adolf Hitler, görkəmli vermaxt generalı F.Qalderin öz
“Hərbi gündəliyində”də yazdığı kimi, “müharibənin məqsədinin Britaniyanı diz
üstə qoymaq, Fransanı isə, darmadağın etmək” olmasını bildirmişdir. Müasir
Benilüks ölkələri — Belçika, Niderland və Lüksemburqa qarşı yönəlmiş əməliyyatın
kod adı “Gelb” planı (“Sarı” plan), Fransaya qarşı yönələn isə “Rot” planı
(“Qırmızı” plan) adlanırdı. 10 may 1940-cı ildə Fransa kampaniyasına başlayan
alman qoşunları “blitskriq”, yəni ildırımsürətli müharibə” taktikası ilə, cəmi
6 həftəyə, müttəfiq ordularınıı demək olar ki, darmadağın edərək, bütün
yuxarıda göstərilən ölkələri işğal etdilər. 22 iyunda Kompyendə təslim olma
aktının imzalanması ilə, Fransa kampaniyası nasist Almaniyası üçün uğurla başa
çatdı və onun gələcək işğalçı addımlarına əlverişli imkanlar açmış oldu.
Açar sözlər: İkinci dünya müharibəsi, nasist Almaniyası, “Gelb”
planı, Dünkerk təxliyyəsi, Fransanın işğalı.
Giriş. 1939-cu ilin 1 sentyabrında nasist Almaniyasının
Polşaya hücumuna cavab olaraq, 2 gün sonra, sentyabrın 3-də Böyük Britaniya və
Fransa hökumətləri Almaniyaya müharibə elan etdilər. Bu, məlum olduğu kimi artıq
ikinci dünya müharibəsinin başlanması demək idi. Həmin vaxt, Fransa-Britaniya
ordusu fransızların 1930-cu illərdə inşa etdikləri “Majino xəttində”,
alman ordusu isə, “Ziqfrid xəttində” cəmlənmişdi. Lakin, hələ irimiqyaslı hərbi
əməliyyatlar aparılmır, alman-fransız sərhədində qəribə bir sakitlik hökm
sürürdü. Məhz, elə buna görədir ki, II dünya müharibəsinin bu dövrü (3 sentyabr
1939-10 may 1940) tarixə “qəribə müharibə” kimi düşmüşdür. Amerikan müəllifləri
müharibənin bu dövrünü “Phoney War”, yəni “saxta, həqiqi olmayan müharibə” də
adlandırmışdılar. (11, s.56)
Lakin, “qəribə müharibə” dövründə,
almanların hərbi əməliyyatları davam etməkdə idi. Belə ki, 1940-cı ilin aprelin
9-da “Vezerübunq” əməliyyatı ilə, alman ordusunun Danimarka və Norveç üzərinə
hücumu başlandı, Danimarka elə həmin gün, bir neçə saatın içərisində işğal edilmişdir.
Norveç isə, bir müddət qətiyyətli müqavimət göstərsə də, bu uğursuzluqla başa
çatmışdır.
Almaniyanın hücum planı. Nasist
Almaniyasının Fransaya və müasir Benilüksə, yəni Belçika, Niderland,
Lüksemburqa hücum əməliyyatının kod adı “Gelb” planı (“Sarı” plan) adlanırdı. Bu
plan, vermaxtın görkəmli strateqlərindən biri olan, general Erix fon Manşteynin
təklifi əsasında, Almaniyanın quru qoşunlarının Baş qərargahı tərəfindən
hazırlanmışdı. Lakin, qeyd etmək lazımdır ki, hələ 9 oktyabr 1939-cu ildə yeni
“6 nömrəli fürer direktivi” qəbul olunan zaman, Adolf Hitler Şərqi Avropanın fəthinə
qədər iki cəbhədə müharibənin qarşısını almaq üçün, Qərbi Avropa xalqlarının məğlub
edilməsi məqsədilə hərbi kampaniyanın aparılması zəruriliyini qəbul edirdi.
Ancaq bu niyyətlər 6 nömrəli direktivə daxil edilməmişdi. (6, s.61)
“Gelb” planı kod adı altında strateji hücum
əməliyyatının həyata keçirilməsi üçün general-polkovnik Valter fon Brauxiçin ümumi
komandanlığı altında, bütövlükdə 136 diviziya, 2,5 min tank, 3,8 min təyyarənin
daxil olduğu “A”, “B” və “C” olmaqla üç
ordu qrupu hərbi əməliyyatlara cəlb olundu. (5)
Plana görə, əsas zərbəni vurmalı olan,
general-polkovnik Gerd fon Rundştedin komandanlıq etdiyi “A” ordu qrupu La-Manş
boğazından çıxmaq məqsədilə, Ardenləri aşaraq “Majino xəttini” keçməli, düşmənin
əsas qüvvələrini dənizə doğru sıxışdıraraq “B” ordu qrupu ilə birləşib onu məhv
etməli idi. Əməliyyatın aparılmasında general Evald fon Kleystin tank qrupu və
general German Qotun 15-ci tank korpusu da əsas rol oynamalı idi.
General-pokovnik Fyodor fon Bokun komandanlıq
etdiyi “B” ordu qrupu Niderlandı ələ keçirmək və yuxarıda göstərildiyi kimi,
“A” ordu qrupu ilə birləşib müttəfiqlərin ordusunu məhv etmək tapşırığı almışdı.
Nəhayət, general-polkovnik Vilhelm fon Leyebin komandanlığı altında olan “C”
ordu qrupu isə, aktiv hərbi əməliyyatlarla fransız qoşunlarını “Majino xəttinə”
sıxışdırmalı, digər iki ordu qrupuna dəstək verməli idi. Bundan əlavə, alman
komandanlığının ehtiyatında 40-dan çox diviziya var idi. (5)
Almaniyada hücumdan əvvəl 4,2 milyon nəfər
quru qoşunlarına (“Heer”), 1 milyon nəfər Hərbi Hava Qüvvələrinə (“Lüftvaffe”),
180 min nəfər Hərbi Dəniz Qüvvələrinə (“Kriqsmarin”) və 100 min nəfər müdafiə dəstələrinə
(“Vaffen SS”) səfərbər olundu. Polşa, Danimarka və Norveçdə olanları da nəzərə
alsaq, 10 may 1940-cı ildə mövcud hücum üçün alman ordusunda 3 milyon nəfər
canlı qüvvə var idi. Həmin ilin may və iyun aylarında qərb cəbhəsindəki alman
ordusunda 2349 tank və 7378 hərbi top var idi. (6, s.35-37)
Niderlandın işğalı. Nasist Almaniyasının siyasi-hərbi rəhbərliyi və
vermaxt komandanlığının planlarına görə, Niderland silahlı qüvvələrinə qarşı
“B” ordu qrupuna daxil olan general-polkovnik Georq fon Küxlerin 18-ci ordusu və
general-polkovnik Valter fon Reyxenaunun 6-cı ordusu hərəkət etməli idi. 6-cı
ordu Niderlandın Rurmon şəhərinin cənubu ilə hərəkət etməli və müttəfiq qüvvələri,
fransız-ingilis və Belçika silahlı qüvvələri
ilə mübarizə aparmalı idi. Lakin, əsas hədəf – holland qüvvələrinin darmadağın
edilməsi 18-ci orduya tapşırılmışdı. Həmin ordu, kiçik qüvvə ilə Niderlandın şimal-şərq
əyalətlərinə hərəkət etməli, əsas qüvvələr isə, sonradan “Hollandiya qalasına” hücum
etmək məqsədilə, aşağı Reyn və Maas çayınən hər iki tərəfində yerləşən Eyssel
mövqeyi və Pel xəttini yarmalı idi. Qeyd etmək lazımdır ki, “Hollandiya qalası”
deyildikdə, “yeni holland su xətti”nin qərb hissəsi nəzərdə tutulur. “Holland
su xətti” isə, Niderland müdafiə sisteminin bir hissəsi olub, onun yaradılması
hələ XVII əsrin əvvəllərində Oranlı Moris tərəfindən düşünülmüş, Frederik Henri
tərəfindən həyata keçirilmişdir. XIX əsrdə Utrextə qədər genişləndirilmiş bu xətt,
“yeni holland su xətti” adlandırılmışdır.
Almanlar Niderland silahlı qüvvələrini daha
tez sıradan çıxarmaq üçün, ilk növbədə onun planlı müdafiəsinin təşkilinə mane
olmaq istəyirdilər. General Hans fon Şponekin 22-ci piyada diviziyası və
general Kurt Ştudentin 7-ci aviadesant diviziyası da, məhz bu məqsəd üçün
ayrılmışdı.
1940-cı il, mayın 10-da alman qoşunlarının
Fransaya və neytral ölkələr olan Belçika, Niderland və Lüksemburqa tərəf hərəkət
etməsi ilə “qəribə müharibə” qəfil sona çatdı. …“Alman işğalının sürəti və işğalın
miqyası müttəfiqləri və bitərəf ölkələri gözənilməz halda yaxaladı”. (2, s.52).
Alman ordusu, elə ilk gündən, Lüksemburqu praktik olaraq müqavimətsiz işğal
etdi. (14, s.122.)
Niderland uğrunda döyüşlər ilk olaraq 18-ci
alman ordusunun hücumu ilə başlandı. Həmin ordu qısa zaman kəsiyində zəif
müdafiə olunmuş şimal-şərq vilayətlərini tutaraq Eyssel kanalının şərq sahillərinə
çatdı. Vermaxt qüvvələrinin son dərəcə sürətli hücumları nəticəsində, Neymeqen
və digər cənub rayonlarındakı bir sıra körpülər, zədələnmədən almanların əlinə
keçdi, Eyssel mövqeyi və Pel xətti yarıldı, hücumun elə ilk günündə buradakı
müdafiəçilər təslim oldular. Niderlandın 2-ci ordu korpusu Vaal çayına doğru
geri çəkilərək, Pel xəttinin arxasında mövqe tutdu. Nisbətən daha yaxşı möhkəmləndirilmiş
Qrebbe xəttinin müdafiəsi, artıq mayın
12-də yarılmağa başlandı. Sonrakı günlərdə isə, şığıyıcı bombardmançıların havadan
dəstəyi, almanların burada həlledici qələbəsini təmin edir. Lakin, Niderland ordusu
üçün ən faciəlisi, “Hollandiya qalası”nda baş verən döyüşlər olur. Rotterdam və
Leyden rayonları arasındakı əraziyə, 22-ci piyada diviziyasının tərkibindən
olan hava desantının çıxarılmasına baxmayaraq, hollandlar bir çox yerlərdə
tamamilə məğlubiyyətə uğrayırlar. Eyni zamanda, almanlar da uğurlu əks tədbirlər
həyata keçirdilər: Rotterdam və Dordrext rayonları arasındakı əraziyə çıxarılmış
alman desantının paraşütçüləri nəinki rəqibinin bütün hücumlarını dəf etmiş, Dordrextin
cənubuna doğru irəliləməyə başlamışdılar. Onlar Murdeyk körpüsü yaxınlığındakı
digər alman desantı ilə əlaqə quraraq, sonrakı hərbi əməliyyatlarda vermaxt
üçün mühüm əhəmiyyət kəsb etmişdilər.
Belə bir ağır dönəmdə, müttəfiqlər
ordusunun da Niderlandı xilas etmək üçün tədbirləri heç bir effekt vermirdi. Məsələn,
7-ci fransız ordusunun vermaxtın 9-cu tank diviziyasını mühasirəyə almaq istəyi
uğursuz olmuş və alman diviziyasının tankları mayın 13-də Rotterdama
çatmışdılar. Həmin gün, Qrebbeberq döyüşündən sonra, hollandların almanlar üzərinə
əks-hücumu da uğursuzluğa düçar olmuş və holland ordusu Qrebbe xəttinə doğru geri
çəkilmişdir.
Almanlar Niderlandı tam şəkildə təslim olmağa
məcbur etmək məqsədilə, əsas şəhərlər üzərinə hava hücumları təşkil etməyə
başladılar. Vermaxt generalı Hans Şmidt əvvəlcə, Rotterdam şəhərinin bombardman
olunacağı planı barədə Niderlanda ultimatum verdi. Niderland ultimatumu qəbul
etdiyi üçün plan ləğv olundu. Lakin, hücumun ləğvi barədə məlumat siqnalı,
artıq şəhər üzərinə hücuma başlayan yüzlərlə “Heinkel He-111” bombardmançı təyyarələrdən
ən azı 50-60-na çatmadı və mayın 14-də onlar şəhərin mərkəzinə təqribən 97 ton
bomba yağdırdılar. Əksər tarixçilərə görə, şəhərin kütləvi yanğınlarla müşayiət
olunan bombardmanı nəticəsində təqribən 900-1000 nəfər dinc sakin həlak olmuş,
85 mindən çox insan evsiz qalmış, minlərlə müxtəlif tikili, kilsə, məktəb tamamilə
dağıntıya məruz qalmışdır. Hətta, bəzi holland və ingilis mənbələrinin, kütləvi
informasiya vasitələrinin məlumatlarına görə, şəhər dağıdılarkən 30 min sakin həlak
olmuş və nasistlər şəhərin qədim binalarını dağıtmaqla barbarlıq aktı həyata
keçirmişdilər (8, s.43)
Nəhayət,
15 mayda kapitulyasiya aktının imzalanması ilə Niderland təslim oldu. Öz ölkəsini
tərk etmiş Niderland kraliçası Vilhelmina Britaniyada mühacir hökumət yaratdı.
(12, s.723).
Belçikanın işğalı. Belçikanın alman
hücumu ərəfəsində ümumilikdə 1338 artilleriya silahına malik olan 22 diviziyası
var idi (1, s.37). Lakin, silahlı qüvvələrin müasir tanklar və texnika ilə təchizatı
son dərəcə aşağı idi. Məsələn, o dövrdə Belçika ordusunda ən müasir tipli tank,
fransız “Renault” şirkətinin 1930-cu illərdə istehsal etməyə başladığı “AMC 35”
yüngül tankları idi ki, ondan da cəmi 10 ədəd var idi. Səfərbər olunmuş ordunun
ümumi sayı 600 min nəfər idi (9, s.95). Almaniya ilə müharibənin başlanğıcında
Belçika Hərbi Hava Qüvvələrində (HHQ) 250 hərbi təyyarə, o cümlədən 90 qırıcı,
12 bombardmançı, 12 kəşfiyyatçı təyyarə var idi. Lakin, bütün bunların təqribən,
yalnız 50-si müasir müharibənin tələblərinə cavab verirdi. (9, s.324)
Müttəfiqlərin qüvvələrinə gəldikdə isə, Belçika əsas köməyi, ilk növbədə Fransadan almışdı. Məsələn, təkcə 1-ci fransız ordusuna daxil olan general Rene Priunun süvari korpusu Belçikanın Jamblu rayonunun müdafiəsi üçün ayrılmışdı. Fransızlar yüzlərlə “Somua-35” orta tanklarına və “Hotkniss H-35” yüngül tanklarına malik idilər ki, həmin tanklar da, tarixçi Mark Hilinin fikrincə, zirehinə və atəş gücünə görə, hətta alman tanklarını da üstələyirdi. (7, s.37) Ümumilikdə, fransızların 2-ci, 7-ci və 9-cu orduları da, Belçika uğrunda döyüşlərdə iştirak etmişdir. Britaniyalıların isə, Belçikadakı əsas qüvvələri, 152 min nəfər canlı qüvvəyə malik 2 korpusdan ibarət olan və general lord Con Qortun komandanlıq etdiyi Britaniya Ekspedisiya Qüvvələrində cəmlənmişdilər. Lakin bütün bunlara baxmayaraq, Belçikanın nasist Almaniyası tərəfindən işğalı cəmi 18 gün çəkdi.
Alman ordusu Belçika üzərinə hücuma əsas vəzifəsi
rəqibin hərbi hava qüvvələrini məhv etmək və səmada üstünlüyü ələ keçirmək olan
“Lüftvaffe” təyyarələrinin hava dəstəyi ilə başladı. Hava döyüşləri “Heinkel He
111”, “Dornier Do 17”, “Messerşmitt Bf 109” kimi müasir tipli alman qırıcı və bombardmançı
təyyarələrinin üstünlüyü şəraitində gedirdi. Belçikalılar belə bir çətin şəraitdə,
1930-cu illərdə tikilmiş və Niderlandla sərhəddə yerləşən Eben-Emal fortuna
böyük ümidlər bəsləyirdilər. Lakin, vermaxt komandanlığı da Eben-Emal fortunun
strateji əhəmiyyətini hiss edərək, hələ Belçika ilə müharibəyə başlamazdan əvvəl,
həmin fortun neytrallaşdırılması məqsədilə hərbi hava əməliyyatı planı
hazırlamışdı. Məhz buna görə də, Fransa kampaniyasının ilk günündə – mayın
10-da alman desantçıları motorsuz uçan aparatlar olan planerlərin köməyi ilə, fort ərazisinə endirildi. Cəmi 24 saata
Belçikanın 7-ci piyada diviziyasının müqavimətini qıran almanlar Eben-Emal
fortunu ələ keçirdilər. Bu, həmçinin almanlara, mühüm strateji plasdarm olan
Albert kanalı sahillərini ələ keçitməyə şərait yaratdı.
Mayın 10–12-də vermaxt ordusu Ardenləri keçərək,
La-Manş boğazına doğru irəliləməyə başladılar. Mayın 12-də, müharibənin ən
böyük tank döyüşlərindən biri olan Annyu döyüşü başlandı və tərəflərdən heç
biri həlledici qələbə qazana bilmədi. Lakin, La-Manşa doğru irəliləyən alman
ordusu müttəfiqləri mühasirəyə alaraq, 5 günə oraya çatmağa nail oldu. Almanlar
müttəfiq ordularını tədricən dənizə doğru geri çəkilməyə məcbur etdilər.
Müttəfiqlərlə
döyüşlər və Dünkerk təxliyyəsi. Majino
xəttinin yarılması və Niderlandın kapitulyasiyasından sonra öz uğurlarını davam
etdirən alman komandanlığı, tezliklə Britaniya Ekspedisiya Qüvvələrinin,
fransız hərbi birləşmələrinin və Belçika ordusunun qalıqlarından ibarət müttəfiqlər
ordusunu, Fransanın şimalında yerləşən Dünkerk şəhərində mühasirəyə almağa
başladılar. Buna görə də, ingilis qoşunlarının komandanı general Con Qort, hələ
mayın 18-dən müttəfiq qoşunlarının Britaniya adalarına təxliyyə edilməsini təklif
edirdi. (13, s.113) Mayın 20-də isə, Abvil fransız şəhərini keçən
alman tank birləşmələri müttəfiqlərin 1-ci ordu qrupunu (tərkibinə 10 ingilis,
18 fransız və 12 Belçika diviziyası daxil idi. – B.M.) dənizə doğru – Arras,
Qravlin, Brügge şəhərlərinə sıxışdırmağa başlamışdılar. Müttəfiqlərə qarşı cənub
və cənub-qərbdən almanların “A” ordu qrupu, şərq və cənub-şərqdən “B” ordu
qrupu irəliləyirdi. Belə bir vəziyyətdə, Uinston Çörçill kabineti və Britaniya
Admirallığı da, Britaniya Ekspedisiya Qüvvələrinin Britaniya adalarına təxliyyə
olunması qərarına gəldilər.
Mayın 21-də, vermaxtın 19-cu korpusu
La-Manşdakı limanları ələ keçirmək məqsədilə hücuma keçmək əmri aldı. Elə həmin
günün ikinci yarısı, ingilis ordusu da Arras şəhərinin cənubunda alman bölmələri
üzərinə əks-hücuma keçdilər (13, s.116-118). Britaniya bölmələrinin
“Matilda I” və “Matilda II” kimi yeni tipli tanklardan istifadəsi, vermaxtın
4-cü ordusu üçün ciddi çətinliklər yaratdı. Almanlar, tezliklə hücumçu təyyarələrin
havadan dəstəyi ilə, bu təhlükəni aradan qaldırsalar da, cənuba doğru bir neçə
kilometr geri oturduldular. Mayın 22-də, general Kleystin tank qrupu Bulon şəhərini
ələ keçirdi. Həmin gün, Britaniyanın hərbi-dəniz nazirliyi, ordunun təxliyyəsində
istifadə etmək üçün ingilis limanlarındakı 40 holland gəmisini müsadirə etdi (3,
s.333). 2-ci tank ordusunun komandanı olmuş general Hayns Quderianın da öz
xatirələrində qeyd etdiyi kimi, almanlar Devr, Same və Bulon şəhərləri ətrafındakı
döyüşlərdə təkcə ingilis-fransız deyil, həmçinin Belçika və holland bölmələri
ilə üz-üzə gəlmişdilər. (10, s.123)
Mayın
24-də almanlar Kale liman şəhərini mühasirəyə aldılar. Əvvəlcə, ingilis-fransız
ordusu şəhəri müdafiə edərək, güclü müqavimət göstərsələr də, mayın 26-sı səhər
“Yunkers Yu-87” şığıyıcı bombardmançılarının hava dəstəyi
ilə, almanların həlledici hücuma keçməsi onların müqavimətini qırdı. Bundan
sonra, həmin günün axşamı, Britaniya
Ekspedisiya Qüvvələri təxliyyə olunma haqqında qəti əmr aldı. Kod adı “Dinamo”
olan əməliyyatın başlamasından dərhal əvvəl, Britaniya hökuməti, şəxsi gəmilərin,
katerlərin və digər gəmilərin ordunun təxliyyəsində istifadə üçün hazır edilməsi
əmrini də verdi (13, s.116-118).
Bu vaxt, belçikalılarla almanlar arasında gərgin döyüşlər davam edirdi. Lakin, Belçika kralı III Leopoldun 1940-cı ilin 28 mayında kapitulyasiya haqqında aktı imzalaması ilə, ölkə 18 günlük şiddətli müqavimətlərindən sonra təslim oldu (12, s.729). Bununla belə, qeyd etmək lazımdır ki, bir sıra alman tarixçilərinin özləri də, 18 günlük qanlı döyüşlərdə Belçika ordusunun ciddi rəqib olduğunu və əsgərlərinin “qeyri-adi cəsurluq” göstərdiyini etiraf ediblər (9, s.95-96). Beləliklə, Belçikanın təslim olması, alman hərbi birləşmələrinin işini nə qədər asanlaşdırdısa, Dünkerdə blokadada olan ingilis-fransız birləşmələrinin vəziyyətini bir o qədər çətinləşdirdi.
Dünkerkdə müttəfiqlər blokadaya alınan
zaman, almanların tank və aviasiya üstünlüyünə malik olmasına baxmayaraq,
Hitler tərəfindən Rundştedtə göndərilmiş əmr ilə hücum qəfil dayandırıldı. Bu qərar
onunla əsaslandırıldı ki, Fransa kampaniyasının növbəti həlledici əməliyyatlarında
istifadə üçün “pantservaffe” qüvvələrinin – alman tank diviziyalarının döyüş bacarığı
saxlanılsın. Bundan başqa, Hitler hesab edirdi ki, demoralizə olunmuş ingilis əsgərlərinin
geri qaytarılması Britaniya hökumətini Almaniya ilə separat sülh bağlamağa sövq
edər və beləliklə də, ən böyük Avropa müttəfiqinin itirilməsinə nail olunar.
Lakin, vermaxt komandanlığının bəzi rəhbərləri, Hitlerin bu qərarını yanlış
hesab etmişdilər. Məsələn, general H.Quderian hesab edirdi ki, Hitlerin bu əmri
əsassızdır və alman ordusu blokadaya alınmış qruplaşmanı məhv edə bilərdi (10, s.128).
Beləliklə,
“Dinamo” əməliyyatı çərçivəsində, 1940-cı il 26 maydan 4 iyuna qədər, Britaniya
hərbi dəniz nazirliyinin verdiyi rəsmi məlumata əsasən, Dünkerk rayonunun
sahillərindən Britaniya adalarına müttəfiqlərin 338226 nəfər hərbi qulluqçusu
inanılmaz şəkildə təxliyyə olundu (2, s.60; 3, s.357). Bu hadisə tarixdə
“Dünkerk möcüzəsi” kimi də tanınır.
Fransanın süqutu. Niderland və Belçikanın işğalı, tezliklə almanlara Fransanın da işğalı üçün yol açmış oldu. 1940-cı il, mayın sonlarında fransız ordularının ən yaxşı hissələri ölkənin şimalına – Almaniyanın hücum istiqamətinə göndərilmişdi. “Gelb” planı üzrə hərbi əməliyyatların gedişində, artıq müttəfiqlər ümumilikdə 61 diviziya itirmişdilər (7, s.84). Fransızlar ağır silah və texnikada çoxlu itkilər vermişdilər. Mayın 19-da Moris Qamelenin istefasından sonra, Fransa ordusunun baş komandanı təyin edilmiş 73 yaşlı general Maksim Veyqanın sərəncamında yalnız 64 fransız diviziyası və britaniyalıların 51-ci piyada divizyası qalmışdı. Ehtiyat qüvvələrdə də kəskin çatışmazlıq yarandığından, Veyqanın 965 km cəbhə xətti boyunca vuruşan fransız əsgərləri uzunsürən döyüşlər nəticəsində tükənərdisə, onları yeni qüvvələrlə əvəz etmək imkanı yox idi. Almanlar isə, həmin vaxt 142 diviziya və La-Manş istisna olmaqla, havada üstünlüyə malik idilər. (7, s.84) Belə bir vəziyyətdə, alman komandanlığı məhz Fransa ordusunun darmadağın edilməsini həyata keçirməyi nəzərdə tutan yeni “Rot” planı (“Qırmızı” plan) hazırlamışdı.
Parisə
daxil olmuş vermaxt əsgərlərinin paradı, 1940-cı il
1940-cı ilin 5 iyununda almanların Somma və Ena istiqamətində irəliləməyə başlaması ilə, “Rot” planının icrası başlandı. Alman ordusu, 1-ci tank birləşməsi eşelonundan istifafə edərək, qısa zaman çərçivəsində Somma və Ena çayları sahilindəki fransız müdafiəsini yarıb ölkənin içərilərinə doğru irəliləməyə başlayırlar. 10 iyunda Fransa hökuməti Parisi “açıq şəhər” elan edir (12, s.738). Elə həmin gün, nasist Almaniyasının ən yaxın müttəfiqlərindən olan İtaliya, Fransaya və Böyük Britaniyaya müharibə elan edir. İtaliyanın faşist lideri Benito Mussolini anlayırdı ki, artıq Fransanın məğlubiyyəti qaçılmazdır və elə buna görə də, italyanların 323 min nəfər canlı qüvvəsi olan “Vest” ordu qrupu Fransa üzərinə hərəkətə başladı. 14 iyunda, alman əsgərləri Parisə daxil oldular. Fransa hökuməti Bordoya köçdü. 1940-cı il, 22 iyunda Kompyendə, vaxtilə 1918-ci ildə Almaniyanın I dünya müharibəsində təslim olmasını təsdiq edən müqavilənin imzalandığı vaqonda Hitler ilə, fransız general Şarl Hyuntsiqerin görüşü zamanı Fransanın kapitulyasiyası haqqında akt imzalandı. 24 iyunda, Fransa rəhbərliyi Roma yaxınlığında İtaliya ilə də kapitulyasiya aktı imzaladı. 25 iyunda hərbi əməliyyatlar rəsmi olaraq başa çatdı.
Nəticə. Nasist Almaniyasının Fransa kampaniyasının əsas nəticəsi,
əvvəldə də qeyd olunduğu kimi, Lüksemburq, Niderland, Belçika və Fransanın məğlubiyyəti
və işğalı oldu. Kapitulyasiya müqaviləsi ilə, Fransa ərazisinin 3/5 hissəsi
Almaniyaya verildi. Fransız ordusu tərk-silah olundu, fransız donanması
Almaniya və İtaliyanın nəzarəti altına keçdi. İtaliya həmçinin 832 km2
ərazi əldə etdi. Fransanın şimalı və qərbi
alman işğal zonasına, cənubu isə, “azad zona”ya (zone libre) bölündü. “Azad
zona”da marşal Filipp Petenin başçılığı ilə “Vişi rejimi” adlanan kollaborsionist
hökumət yaradıldı. Petenin Vişi hökumətini legitim olaraq tanımaqdan imtina edən
Şarl de Qoll, həmin vaxtdan etibarən “Azad Fransa” qüvvələrini formalaşdırmağa
başladı. (4, s.336-339). Tezliklə, digər fransız zonalarının da nasistlər tərəfindən
işğalı başlandı və bu proses 1942-ci ilin noyabrına kimi davam etdi. Almanlar
“Anton” əməliyyatına başlayaraq Vişi hökumətinin nəzarətində olan cənubi
Fransanı da işğal edərək bütün Fransanın işğalını başa çatdırdılar (4, s.635).
İstifadə
olunmuş ədəbiyyat
1.
Bond
B., Taylor M. The Battle of France and Flanders 1940. London, Leo Cooper, 2001.
– p.224.
2.
But
O., Uolton C. II dünya müharibəsinin şəkilli tarixi (ingilis dilindən tərcümə).
Bakı, TEAS Press, 2016. – s.256.
3.
Черчилль У. Вторая
мировая война. В
шести томах. Москва, Воениздат, 1991. – 704 с.
4.
Dear
I., Foot M. The Oxford Companion to World War II. London, Oxford University
Press, 2001. – p.1072.
5.
Французская кампания
1940 // Большая Российская Энциклопедия Mənbə: https://bigenc.ru/military_science/text/4722554 [Müraciət tarixi:08.03.2021]
6.
Frieser
K. The Blitzkrieg Legend: The 1940 Campaign in the West. Annapolis, MD: Naval
Institute Press, 2005. – p.555.
7.
Healy
M. Panzerwaffe: The Campaigns in the West 1940. London, Ian Allan, 2008. –
p.96.
8.
Hinchcliffe
P. The other battle: Luftwaffe night aces versus Bomber Command. Shrewsbury, Airlife Publishing, 2001. – p.352.
9.
Keegan
J. The Second World War. New York, Penguin Books, 2005. – p.608.
10.
Гудериан Г. Воспоминания немецкого
генерала. Танковые войска Германии во Второй мировой войне 1939-1945.
Москва, ЗАО Центрполиграф, 2013. – с.574.
11.
Лиддел
Гарт Б. Вторая мировая война. Москва, АСТ, 1999. – с.944.
12.
Shirer
W. The Rise and Fall of the Third Reich: A History of Nazi Germany. New York, Simon&Schuster,
1990. – p.1249.
13.
Типпельскирх К.
История Второй мировой войны 1939-1945. Санкт-Петербург, Полигон, 1999. – 796 с.
14.
Weinberg
G. A World at Arms: A Global History of World War II. London, Cambridge
University Press, 1994. – p.945.
BALAMIRZA MAMMADLI
THE
FRENCH CAMPAIGN OF NAZI GERMANY AND ITS AFTERMATH
The French campaign of Nazi
Germany, known in Western historiography as "The Fall of France", is
one of the most important events of the first stage of World War II. Adolf
Hitler aimed at war Britain and France, who declared war on Germany, in
response to the German invasion of Poland, said the aim of the war was “to
bring Britain to its knees and destroy France”, as the distinguished Wehrmacht
general F.Halder wrote in his “Military diary”. The codename for the operation
against the modern Benelux countries – Belgium, the Netherlands and Luxembourg,
was called the Gelb (yellow) plan, and against France, the Roth (red) plan. On
May 10, 1940, German forces launched the French campaign, using lightning-fast
blitzkrieg tactics to disperse Allied forces for nearly six weeks, occupying
all of the aforementioned countries. With the signing of the act of surrender
in Compiegne on June 22 of the same year, the French campaign ended
successfully for Nazi Germany, opening up the possibility of its future
aggression.
Keywords: World War II,
Nazi Germany, “Gelb” plan, Dunkirk evacuation, occupation of France.
Комментарии
Отправить комментарий